Dalla Redazione de ilSicilia.it, questo è Li stiddi di Patti Fox, il nostro oroscopo, rigorosamente, in lingua siciliana. L’appuntamento con le stelle a cadenza settimanale, ogni venerdì, con la vostra Patti Fox.
Per ricevere una notifica quando esce un nuovo episodio, iscrivetevi al podcast “Li stiddi di Patti Fox”.
Ma cosa ricinu li stiddi sta simana? 8-14 Giugnu 2024
Ariete
Arieti di lu me cori, sta simana faciti focu e fiammi. Aviti na prufunnità e n’alleria ca arrivanu dritti a lu cori. Siti furtunati, adunca, sia nto travagghiu, ca nt’amuri. “Ucca amara tenila cara”. Addivirtitivi cu Gemelli, Virgini e Pisci e ni sti setti jorna ascutati “Quando”, na canzuni di Pino Daniele.
Amuri 10; Travagghiu 10; Furtuna 10
Toro
Tori beddi, sta simana aviti a esseri sicuri, ziccusi e nuddu l’ava a passari liscia. Troppu boni siti cu ccu ‘un si merita nenti. Chistu vali pi lu travagghiu, ma siddu è lu casu, puru, nt’amuri. “Centu latri nun ponno spugghiari un nudu”. Addivirtitivi cu Bilancie, Scurpiuna e Sagittari e ni sti setti jorna ascutati “Mare Mare ”, na canzuni di Luca Carboni.
Amuri 9; Travagghiu 9; Furtuna 9
Gemelli
Gemelli mia, sta simana aviti a fari na bedda pulizia, picchì ci su canuscenti ca vonnu sulu e un dunanu nenti. Pinzatici e liberativi di sti cosi ‘nutili sia nto travagghiu, ca nt’amuri. “Cu manìa ’un pinìa”. Addivirtitivi cu Tori, Cancri, Liuna e Capricorna e ni sti setti jorna ascutati “Ogni volta”, na canzuni di Vasco Rossi.
Amuri 7; Travagghiu 7; Furtuna 9
Cancro
Cari li me Cancri, sta simana tutti chiddu ca pinzati addiventa realtà e, quinni, m’arracumannu ni la testa hannu a caminari sulu cosi beddi. L’amuri e lu travagghiu dipenninu si o no stu consigghiu. “Cui simina spini, nun ricogghi rosi”. Addivirtitivi cu Vergini, Scurpiuna e Acquari e ni setti jorna ascutati “Oggi sono io”, na canzuni di Alex Britti.
Amuri 10; Travagghiu 10; Furtuna 10
Leone
Liuna amurusi, sta simana, era ura, passati da monaci di clausura a nisciulini. Aviti la testa ca ‘un si ferma mai nto travagghiu e lu cori ca vulissi cuminciari a battiri pi quarchedunu, ma ancora ‘un c’arrinesci. ”Dui priuri ‘nta un cunventu nun ponnu stari”. Addivirtitivi cu Gemelli, Cancri e Pisci e ni sti setti jorna ascutati “Ragazzo mio”, na canzuni di Loredana Bertè.
Amuri 10; Travagghiu 8; Furtuna 10
Vergine
Vergini beddi, sta simana aviti a manteniri la carma: lu me consigghiu è di nesciri accussì ‘un pinzati sempri a la stissa cosa e a li stissi cristiani. Amuri e travagghiu s’aggualanu. “‘Fabbrica e liti – Non vi cci mittiti”. Addivirtitivi cu Gemelli e Scurpiuna e ni sti setti jorna ascutati “Che vita è” , na canzuni di Irene Grandi.
Amuri 8; Travagghiu 8; Furtuna 8
Bilancia
Bilancie di lu me cori, sta simana lu celu è bunareddu. Vuatri, però, aviti a esseri chiari picchì troppu spissu ‘un vi faciti capiri sia nt’amuri, ca nto travagghiu. Spidugghiati sta lingua e diciti nzoccu vuliti. “L’aceddu si canusci a li pinni, e l’omu a lu parrari”. Addivirtitivi cu Gemelli, Sagittari e Capricorna e ni sti setti jorna ascutati “Signor Tentenna,” na canzuni di li Carmen Consoli.
Amuri 9; Travagghiu 8 ; Furtuna 9
Scorpione
Scurpiuna beddi, sta simana siti timuni e pi nenti vela. Chistu assignifica ca siti saggi, sistimati, e aviti na parola duci pi tutti, ca, sia nto travagghiu, ca nt’amuri, s’addumannanu nzoccu vi successi. “Nun tantu billi billi, ch’un sulu billi basta”. Addivirtitivi cu Liuna, Sagittari, Acquari e Pisci e ni sti setti jorna ascutati “Nuddu è di nuddu (e nuddu m’avi)”, na canzuni di Olivia Sellerio.
Amuri 10; Travagghiu 10; Furtuna 10
Sagittario
Cari li me Sagittari, sta simana o faciti tropp’assai o faciti troppu picca. In tutti li du casi, sbagghiati. Circati di firmarivi tanticchiedda, ca mali ‘un vi fa, sia nto travagghiu, ca nt’amuri. “Ogni fruttu voli la so stasciuni”. Addivirtitivi cu Arieti e Vergini, l’unici ca vi supportanu, e ni sti setti jorna ascutati “Stai attenta”, na canzuni di li Negramaro.
Amuri 7; Travagghiu 7; Fortuna 7
Capricorno
Capricorna mia, sta simana vi sintiti perseguitati politici e pinzati ca ci su complotti unnegghiè. Vi stati facennu un firm ca viriti in sulità. L’amuri è pacinziusu, lu travgghiu tanticchia cchiu tignusu. “Quattr’omini cci vonnu pri fari una bona ‘nzalata, un pazzu, un saviu, un avaru e un sfragaru”. Addivirtitivi cu Tori, Liuna e Pisci, li tri di l’Ave Maria, e ni sti setti jorna ascutati “Ti muovi”, na canzuni di Diodato.
Amuri 8; Travagghiu 6; Furtuna 7
Acquario
Cari li me Acquari, sta simana l’amuri è pusiziunatu avanti a tuttu, ma lu travagghiu mancu babbia. Arrinisciti nzoccu vuliti picchì sapiti chiddu ca valiti. ”Ricchizzi senza littri è un corpu senz’anima”. Addivirtitivi cu Arieti, Gemelli, Scurpiuna e Pisci e ni sti setti jorna ascutati “Com’è profondo il mare”, na canzuni di Lucio Dalla.
Amuri 10; Travagghiu 9; Furtuna 10
Pesci
Pisci amurusi, sta simana aviti la luna di traversu e circati di sciarriarivi pi ogni cosa. Picchì, si siti accussì duci e vuliti amuri e paci? Sicunnu mia stati sfidannu e studiannu quarcunu sia nto travagghiu, ca nt’amuri. “Travagghiu di vinnigna, ti ‘signa, ti sgrigna, t’alligna e ti spigna”. Addivirtitivi cu Gemelli, Vergini e Sagittari e ni sti setti jorna ascutati “Per due come noi”, na canzuni di Brunori Sas.
Amuri 8; Travagghiu 8; Furtuna 9